Тексас шорцот е секогаш добар избор за урбан лежерен стајлинг, погоден за сите варијанти и пригоди, а особено во топлите летни денови кога императив е удобноста и пријатното чувство во она што го носите. Во денешното креативно катче ви претставуваме интересна и практична идеја, со која на старите и износени фармерки или тексас шорцеви можете да им дадете комплетно нов сјај во пресрет на летото. За старите милиња веќе утврдивме дека се одличен материјал за креирање шик модни детали, па и овојпат, везовите и плетките, се сè што ви е потребно, со малку издвоено време и минимален труд, да создадете ново и уникатно модно парче и да ја освежите вашата гардероба. Бохо шорцевите се романтични и модерни, со безброј можности за комбинирање, за шик или винтиџ изглед со бохемиски шарм.
Потребно ви е:
– пар стари фармерки или тексас шорцеви
– стар вез (миле)
– ножици
– шпенагли
– игла и конец
Начин на изработка:
Постапката е прилично едноставна, и во голема мера зависи од вашиот вкус и желби. Доколку се одлучите за изработка да користите стари фармерки, тогаш со ножици исечете ги ногавиците, така што ќе добиете шорц, со димензии и изглед по ваша желба. На шорцевите, од надворешната страна кај работ со ножици отстранете парче тексас. Тоа може да биде со големина и форма според ваша замисла, триаголно или, пак заоблено. Потоа, со игла и конец на негово место сошијте парче од милето со ист или сличен облик. Вашиот бохо шорц е спремен за прошетка низ градските улици.