Меѓу дождливите долини и пространите шуми на Портланд, сместено е навистина чудесно место, познато како портландската јапонска градина. Се смета за најавтентичната јапонска градина надвор од Јапонија, а магичните градини се атракција за голем број посетители, кои секоја година доаѓаат овде од сите краишта на светот.
Со климата слична на онаа во централна Јапонија, Портланд се претставил како совршена локација за ова ремек дело на професорот Takumo Tono. Паркот бележи речиси 50 години постоење, а јапонските градини првпат се отворени за посета во текот на 1967 година.
Дизајниран е во пет различни стилови, со исто толку автентични јапонски градини од камен, вода и билки, но и голем број секундарни елементи како што се пагода, езерца и мостови. Дизајнерите ја осмислиле секоја градина со посебна намена. Така, една од нив е место кое е наменето за уживање и размислување, па содржи сликовити патеки за прошетка, кои претставуваат различни патувања. Во друга пак, фокусот е ставен на празниот простор, па затоа пејзажот е отворен, празен и нема толку билки како во другите градини. Креирани се со асиметричен дизајн, како идеализирана претстава на естетиката на природата.
Петте магични јапонски градини се жива рефлексија на историјата и традиционалната култура на Јапонија. Велат, срцето на јапонската градина е хармонија со природата. Традиционално, нивната намена е поврзување на човекот со природата и создавање чувство на мир, баланс и хармонија.