Располага со површина од скромни 40 м2, но е совршен пример како и не толку големите и масивни станови можат да изгледаат убаво и функционално, а истовремено да се пријатни и удобни за живеење. Добриот распоред и организација се клучни за станбените катчиња кои се со лимитирачки мал простор, а во овој мини дом тоа е многу вешто постигнато, така што е поделен на две зони со рационален дизајн и паметни решенија во уредувањето: во едната се интегрирани кујната и трпезаријата, а во другата, во отворена целина сместени се дневната и спалната соба. Белите ѕидови, ормари и светлиот под му даваат светлост и свежина, додека занимливите оригинални детали како аквариумот во ѕидот и уникатните винтиџ фотелји внесуваат многу топлина, стил и шарм. Акцентираниот ѕид со цигли совршено се вклопува во белото опкружување, а она што остава најсилен впечаток е начинот на кој е украсен целиот простор со мноштво прекрасни цветни аранжмани и декоративни билки. Пресладок дом во малку квадрати, кој инспирира со својата нежна и софистицирана убавина…
