Уште една несекојдневна убава и весела потврда дека големото не секогаш е и најдобро, е овој шармантен семеен дом во Калифорнија, сопственост на млад брачен пар со мало дете. Трочленото американско семејство живее во бунгалов со вкупна површина од само 37 метри квадратни, а во малата квадратура умешно се спакувани мини дневна соба со софа, екипирана кујна, трпезарија, бања и два лежаи. Не само што восхитува со функционалноста и паметното искористување на расположливиот простор, туку и со оптимистичниот шарен ентериер, докажувајќи уште еднаш дека добрата организација и облагородувањето на просторот со убави детали, е се’ што е потребно, задури и најмалиот простор да се претвори во прекрасен дом. Уреден е во манир кој стилски ги рефлектира 20-тите години од минатиот век, со бела боја како основа на ѕидовите и плакарите, и колоритни детали во интензивни нијанси на тиркизни, розови, портокалови, корално црвени и зелени тонови. Мноштво украси со разиграни бои, ѕиден декор, перничиња со шарени дезени, книги, цветни аранжмани и детали со свежа ретро нота, вклопени се во целина која едноставно зрачи со позитивна животна енергија. Како инспиративни решенија од уредувањето на внатрешноста може да се издвојат шарените прекривки наместо завеси, и практичната идеја за флексибилен кревет, идеален за малиот простор со кој се располага.
