DivianArts освен што е сајт посветен на креативната страна на животот, има и за цел да поддржува и промовира млади таленти кои се занимаваат со некој вид на уметност, а со тоа и да ги охрабри сите оние кои носат креативен дар, да го споделат со нас и нашите читатели.
Дозволете ни да ве запознаеме со младиот и талентиран дипломиран сликар Максим Димитров од Скопје. Еве што тој ни раскажа за неговите дела, инспирацијата и креативноста како начин на живот.
За себе…
За себе вели дека е реалист и ги сака работите такви какви што се, природни. Во уметноста го сака реализмот како правец, верува во искреноста на тие слики. Сликата има свој карактер, своја приказна. Идејата е најважна, пораката што му се пренесува на гледачот. Неговото мислење за уметноста е дека таа не познава граници и незаменливото чувство на слобода е момент по којшто секој цели, а уметноста бескрајно го поседува.
За инспирацијата…
Најголема инспирација му е шетањето и откривањето на нови видици, нови погледи и моменти, несекојдневни случувања, моменти од животот, ситуации, го интересира како нештата функционираат на свој начин, спонтано и природно.
Љубовта кон сликарството
Скромен, приземен и секогаш позитивен, Максим отсекогаш имал љубов и страст кон ликовното изразување: „Тоа што најмногу ме води кон ликовното изразување е моментот на сликање, изработката на сликата, концентрацијата, како идејата преминува во реализација – задоволството е неописливо. Љубовта започнува од срцето, колку повеќе те исполнува креативноста преку сликањето, толку повеќе и повеќе сакаш да создаваш” – ни раскажа тој.
Процесот на творење
За неговите идеи да бидат совршено претставени на слика, Максим користи различни техники на сликање и материјали. „Кога станува збор за работата, тука материјалот или техниката имаат голема улога. Работам со разни техники – масло, акрил, акварел, графит и молив, а најомилена техника ми е сувиот пастел. Сакам да сликам пејсажи, особено директно сликајќи во живо, како и портрети, кога длабоко навлегуваш во суштината на одреден карактер. Исто така експериментирам преку карикатури или нови техники при цртање”.
За идните планови и креативноста…
„Наредно што планирам е покрај реалното сликарство на платно, да започнам и со дигитална уметност, слики во дигитална форма, во интересен и модерен стил.
Моја порака за младите е да не се откажуваат и да целат кон она што го сакаат од сѐ срце. Креативно да се изразуваат и да бидат уникатни, како и да веруваат во себе, затоа што креативноста ја буди свеста и ја разигрува фантазијата кај поединецот”.
Делата на Максим Димитров можете да ги погледнете и на неговата фан-страница:
https://www.facebook.com/dimitrovmaks
