Спонтани фотографии со огромна впечатливост која не Ве остава да го тргнете погледот. Младата талентирана, Мона Мојс, преку објективот ја достигнува реалноста, онаа која често ни се крие од видното поле.
Љубовта кон фотографијата започнала од нејзината средношколска возраст, а веднаш по матурирањето се запишува на курс. Со постепено надоградување, фотографијата станува нејзина професија.
Во Македонија работам за разни веб сајтови и приватни настани, а за време на летната сезона работам на Ибица. Тоа ми помага да не влезам во монотонија која мене искрено би ме убила Лично многу сакам да патувам и ми одговара што фотографијата како професија бара многу патување. Патувањата, насмеаните луѓе, позитивните енергии, запознавањето на разните култури и животот на луѓето низ светот, сето тоа ме инспирира, сето тоа е вредно за фотографија, а во последно време почнав да се занимавам и со фото стории за кои ме инспирираат тајните позади насмевките околу нас односно животот на луѓето со длабоко минато позади нив.
Приоритет на Мона кај фотографијата е природната светлина. Таа на почетниците им препорачува да се пронајдат себеси и воедно со тоа да го пронајдат стилот на фотографија кој најмногу ќе им одговара. Тука е интернетот кој изобилува со добри и корисни совети за сите оние кои решиле да се занимаваат со овој дел од седмата уметност.
Покрај фотографија, Мона држи часови по Зумба. Одличен и забавен начин за одржување на телото, а и воедно духот со позитивна енергија.
