Дизајнерката за ентериер и осветлување Elina Dasira заслужна е за интересниот концепт на овој шарен стан, чија намена е да биде дом за млад пар. Бидејки двојката минува голем дел од времето во домот со семејството и пријателите, едно од барањата било тој да биде удобно и модерно место. Идејата при внатрешното уредување била да се создаде различен амбиент во секоја соба, испириран од четирите годишни времиња. Секоја соба има единствена позитивна енергија, благодарение на живите бои и користењето природни материјали при дизајнирањето на ентериерот. Утрото започнува во удобната кујна, модерна и свежа, со многу природна светлина и ергономично уредена. Ѕидниот тапет остава отворен прозорец за пролетниот здив да ја разнесе ведрината за убав почеток на денот. Во 40 метри квадратни сместени се трпезаријата и дневниот престој, каде сопствениците можат да уживаат во природните материјали и оригиналното таванско осветлување, додека атмосферата содржи есенска тема. Тиркизната боја на ѕидовите во спалната соба, пак, создава опуштено летно чувство – како да се наоѓате на базен, додека бојата се одразува во остатокот од просторијата.
