Потребна била една деценија посветена работа и труд, за старата, но добро сочувана куќа од 19-тиот век, целосно да се преуреди, и прилагоди на потребите за удобен живот на младо семејство со три мали девојчиња. Резултатот денес е неверојатно убав семеен дом, како пресликан од детските мечти, со стара романтична градба, опкружен од живописната природа, магијата на селската идила и аромата на летото, која се вдишува во секое катче од оваа идилична куќа. Желбата да им обезбедат мир, хармонија и спокојно детство на нивните деца, ги навела Bolzan Sabine и нејзиниот сопруг на радикален потег – да го напуштат градскиот метеж и бука, и да се повлечат во убавините на шпанската провинција, во потрага по дом за нов почеток. Ја пронашле оваа куќа, опколена со дрвја, лозја и грст светлина, и во наредните 10 години со многу вкус и љубов ја уредувале и украсувале, инспирирани од амбиентот на надворешноста. Внатрешноста на домот е ,,облечена’’ во топлината на беж, кафените и сивите тонови, како и меките памучни и ленени материјали, допири од дрво и стари ткаенини. Светлината продира во секој простор, а секоја соба е засебно уредена, со различен дизајн и приказна, па така, некои се исклучиво класични, некои рустикални, но како целина се компактни и заедно формираат несекојдневно пријатен спој на стилови. Мамат воздишки домашната библиотека и љубовта кон читањето, изразено воочлива во деталите, како и цветните декорации и суптилните украси, давајќи и дополнителен сјај и шарм на оваа визуелна бајка. А кога ќе се излезе надвор, најтешко е да се пресуди дали магичните пејсажи, или, пак, преубавата цветна градина со тераса, е она што повеќе воодушевува и инспирира. Неодолив дом од соништата за неговите сопственици, во кој царуваат детските мечти и љубовта кон животот.
