00002

Со богата понуда од филмски наслови, меѓу кои и најновите остварувања на еминентни имиња од светската кинематографија, започнува уште едно, 16-то по ред издание на Скопскиот филмски фестивал. Осумдневното празнување на седмата уметност во метрополата трае од 19 до 27 април, а влубениците во филмската магија проекциите на овогодинешните фестивалски адути ќе може да ги проследат во салите  на градските кина ,,Милениум’’ и ,,Рамстор’’.

За пасионираните љубители на естетиката и емоциите кои ги испорачува филмската уметност, 16.Скопски филмски фестивал нуди ретка можност за секојдневно патување низ различните светови и авторски визии, или откривање на нови неверојатни животни стории и ликови, искусувајќи го најдоброто што филмскиот хоризонт го нуди во моментов, a спакувано во примамливата и сеопфатна фестивалска програма. Квалитетната  селекција на филмови од домашна и странска продукција е распределена во главната програма, програмата на авторски филм, документарни филмови, краткометражни филмови и македонски краткометражни филмови.

im-so-excited-cast-almodovar-19760

Главната програма е во знакот на најновите филмски остварувања, повеќето учесници на познатите светски фестивали и наградени или номинирани за престижни филмски награди. Премиерно ќе биде прикажан последниот филм на шпанскиот оскаровец Педро Алмодовар, комедијата ,,Многу сум возбуден!’’. Меѓу останатите наслови се и ,,Насилство 2’’ на Такеши Китано, Гас ван Сант со „Ветена земја“, „Седум психопати’’ во режија на Мартин МекДона и со Колин Фарел во една од улогите, „Кралска афера“ на Николај Арсел, како и минатогодишниот учесник на Канскиот фестивал „Кралството на месечината“ , режиран од Вес Андерсон. Тука се и ,,Хајд парк на Хадсон’’ на Роџер Мишел и ,, Лов’’ од Томас Винтерберг.

springbreakers_02

Програмата на авторски филм, пак, го нуди контроверзното филмско дело на американскиот режисер Хармони Корин ,,Пролетен распуст’’ со популарните Џејмс Франко и Селена Гомез, а своја проекција ќе имаат и чилеанската историска драма ,, Не’’ од Пабло Лареин,  Теренс Нанс со ,,Поедноставувајќи ја нејзината убавина’’ и  ,,Перверзен водич во идеологијата’’ режиран од Софи Фајнс. Дел од програмата е и рускиот филм ,,Предавство“ , во режија на Кирил Сребреников, со главните улоги доверени на македонскиот актер Дејан Лилиќ, и неговата германска партнерка Франциска Петри. Филмот беше премиерно прикажан минатата година на фестивалот во Венеција, а македонските филмски гледачи ќе имаат можност да го проследат на последниот фестивалски ден.

izmena

Македонската продукција и копродукција на овогодинешното издание на Скопскиот филмски фестивал е застапена исклучиво во краткометражните филмови, и тоа во 4 филмски проекти : ,,Игра и спас’’ режиран од Горан Тренчовски, македонско-норвешката копродукција ,,Шумарот’’  во режија на Изер Алиу, ,,Кружно патување на сенката’’  од Жарко Иванов, и македонско-бугарската соработка во ,, Шшшт… Запеј ми!’’ на Андреј Волкашин и Петар Влчев.

krugovi_v_02

Отворањето на фестивалот е резервиранo за српскиот филм ,,Кругови’’, повеќекратен добитник на награди во режија на Срдан Голубовиќ. Филмска сторија базирана на вистинит настан, во која се испреплетни моралните дилеми, константната борба на доброто и злото, и простувањето како акт на спасување на сопствената душа. Раскажана е во поствоен контекст и со ликови од секојдневието, кои умешно ги толкуваат одличните Александар Берчек, Небојша Глоговац, Леон Лучев, Вук Костиќ, како и останатите членови на актерската екипа. Светската премиера на „Кругови“ се случи на фестивалот Санденс оваа година, а со неговото претставување пред скопската публика и официјално се означува стартот на уште едно неверојатно осумдневно филмско искуство.

СПОДЕЛИ
Претходна објаваПортрети од банкноти
Следна објаваДа се биде херој
Воден од премисата дека патувањата се празник за душата, а убавиот топол дом нејзино единствено прибежиште, во рамки на креативната страна на животот ги промовира содржините со кои ги збогатува ваквите видици. Неуморен трагач по малите животни радости, со космополитски дух, неизмерна љубов кон животните и пасија кон сите уметнички форми на емотивна експресија. Вљубеник во минимализмот, алтернативната музика, пишаниот збор на Мураками и шармот на Јужна Франција.

1 коментар

Comments are closed.