Во петок на 3ти декември македонската музичка сцена ќе биде збогатена со концертот на нашите двајца врвни музичари Бојан Илкоски и Дино Имери, кои ќе се претстават со нивниот прв албум насловен како “PASSIONS”. Со најавата на овој прекрасен културен настан, публиката и сите ние се подготвувме за едно посебно емотивно-музичко доживување.

”Преубавиот звук на неговиот инструмент веднаш го заробува слушателот, му ги отвара звучните асоцијации со веќе препознатливи звучни димензии на познати виолинисти, и тоа можеби е и една длабоко филозофска и реална компонента која овој храбар виолинист го турка низ магичниот свет на бравурата, ѓаволскиот виртуозитет и кон поголеми хоризонти кон кои секој вистински амбициозен уметник се стреми.“

-Васка Наумовска Томовска – (критичар)

?Бојан Илкоски (виолинист) (фотограф) Маја Аргакијева

– Бојан, дали го паметите моментот кога за прв пат ја земавте виолината в раце?

• Се разбира. Првиот контакт со инструментот виолина се случи во мојата 6та година. Тоа се сеќавања кои секогаш ќе бидат моќни и свежи во мене заради тоа што уште тогаш знаев и чувствував дека мојата љубов и пасија е насочена спрема музиката. На некој начин љубовта спрема овој инструмент ми беше пренесена затоа што мојот вујко беше исто така виолинист и од време на време тој знаеше да ми покаже и да отсвири понекој тон за мене. Тоа за дете како мене беше огромна импресија и радост слушајќи го виолинскиот звук кој отсекогаш ме асоцирал на еден прекрасен женски вокал. Таа импресија ја чувствувам и денес веќе и како изграден музичар и виолинист. Меѓутоа сакам да кажам дека музиката била клучниот играч и отсекогаш била таа која што ме води низ животот и моето секојдневие обраќајки се преку мене, а од денешна перспектива виолината како инструмент е само медиум од каде излегува мојот внатрешен глас, музичка мисла, енергија, љубов и пасија спрема музиката и уметноста.                                                                                                                                                                                                    – Вашиот прв аплауз, кажете ни го чувството.                                               
• Контактот со публиката и нивните реакции се нешто вистинско и есенцијално. Секој нареден аплауз и енергија насочена од публиката кон мене е нова и уникатна. Концертот за мене претставува комуникација и еден вид ритуал каде ние музичарите комуницираме со публиката на посебен начин, но и со самите себе. Чувството и енергијата на секој концерт за мене е оригинална и возбудлива, есенцијална и непроценливо вредна заради тоа што преку концертите ние всушност директно го споделуваме уметничкиот момент на слобода и создавање, момент на интерпретација која секогаш мора да е искрена преку музиката вклучувајќи ги делата кои ги изведуваме.  

– Постои ли во вашиот репертоар композиторски опус кој би можеле да го наречете ваш фаворит?

• Секое музичко дело од било кој композиторски опус за мене претставува нова приказна, различна филозофија, поинаква форма, на некој начин тоа се многу универзуми во музичкот свет и во тој случај тешко е за секој репродуктивен уметник да одбира фаворити. Но кога би морал да издвојам секако би издвоил повеќе ремек дела кои претставуваат монументална вредност како за мене лично така и во музиката и секако во светскиот виолински репертоар . Тука би ги издвоил 6те сонати и партити за соло виолина од Јохан Себастијан Бах, 10 сонати за виолина и пијано од Лудвиг ван Бетовен, прекрасната соната за виолина и пијано од Цезар Франк, сонатите за виолина од Јоханес Брамс, 6 сонати за соло виолина од белгискиот виолинист и композитор Јуџин Изаи и многу други.

– Во светот станува пракса изведбата на класичната музика да се сценски перформанс. Дали вам лично ви допаѓа ова?

• Јас лично тоа го разбирам како начин се` повеќе да се доближи класичната музика до секој слушател и да ја прифати затоа што верувам дека класичната музика може да делува понекогаш и апстрактно. Во секој случај поддржувам се` што е иновативно во музиката и уметноста и нешто што во себе содржи некаква идеја и порака и многу важно нешто што е искрено и со љубов направено. Јас лично досега не сум испробал да направам таков вид на експеримент, музика и сценски перформанс, но идеите и креативноста на еден уметник немаат граници што значи дека никогаш не е доцна да се направи нешто убаво, иновативно и оригинално и привлечно за публиката. 

– Што би им порачале на младите таленти?

• На младите луѓе и таленти би им порачал да го работат тоа што го сакаат и тоа што ги прави среќни, да работат и вложуваат во нивните идеи, да вложуваат во нивната креативност, да се следат себе, да го следат нивниот дух и слобода, а тоа се постигнува само со желба, знаење, свест, умешност и огромен труд, труд кој мора да се вложи, но и да се ужива во него.

Дино Имери и Бојан Илкоски

Фотографија; Маја Аргакијева

 Програма за концерт   

?

Бојан Илкоски (1992) го започнува на 7-годишна возраст во ДМБУЦ Илија Николовски Луј каде ги завршува нижото и средно музичко образование. Првите контакти со виолината ги остварува на својата седум годишна возраст со проф. Румен Димитриев и Зоран Џорлев, а дипломира на Факултетот за Музичка Уметност во Скопје во класата на проф. Олег Кондратенко. Илоски досега има остварено бројни настапи во земјава и надвор од границите на Македонија, и тоа во Романија, Србија, Хрватска, Бугарија. Има остварено неколку настапи како солист заедно со Македонската Филхармонија како и со Камерниот Оркестар при ФМУ, а во 2009 го одржал и својот прв самостоен целовечерен концерт во Даут Пашиниот Амам. Заедно со пијанистот Дино Имери основаат камерно дуо и остваруваат број ни настапи како во државата, така и надвор од нашите граници. Настапуваат на Европскиот Концерт приреден од Музичките и балетски педагози на Македонија, заедно со Europian Union of Music Competition of Youth. Заедно беа повикани свечено да го отворат реномираниот натпревар Охридски Бисери 2015, Фестивалот А-Фест во Нови Сад-Р. Србија, а во 2013 го изведуваат Рециталот Доаѓаме во организација на КИЦ. Заедно настапуваат во шпанската амбасада по покана на амбасадорот Fernando de Galainena Rodrigez.

Во досегашното искуство како виолинист Илкоски вбројува и неколку соло рецитали без пијано придружба кои се од исклучителна важност и претставуваат огромен предизвик за секој инструменнталист, воопшто. Со концерти од овој тип се пртставува и на фестивалот Златна Лира 2017 во организација на СМУМ. Заедно со Симфонискиот и Камерниот оркестар при ФМУ остварува настапи во земјава и странство, во Р.Хрватска и Р. Босна и Хецеговина. Како камерен музичар, Иклоски соработува со светски реномирани имиња како Франсис Дирој и светски познатиот виолончелист и дирегент Марк Копеј. Остварува контакт и соработка со виолинистот Сретен Крстиќ (концерт-мајстор на Минхенска Филхармонија). Член е на меѓународниот младински камерен оркестар на Музичка Младина под водство на познати и реномирани диригенти како Саша Николовски-Ѓумар, Борјан Цанев, Дијана Илкоска, Елена Митревска, Емилио Перкан (настапи на Охридско Лето, Интерфест-Битола и Скопско Лето.

Илиоски е редовен член на симфонскиот оркестар при Македонската Филхарминија како и член на оркестарот за филмска музика FAME’S.