Создадено со помош на италијански занаетчии…
Диор ја претстави својата колекција Круз 2021, која е дизајнирана како омаж на традиционалните занаети и вештини на Пуља. За да ги потенцира вештините на локалните уметници, Марија Грација Кјури ангажирала цел спектар на мајстори, вклучувајќи ја везилката Марилена Спараши, како и ткајачките Џулија и Лусија Стараче, кои помогнале во креирањето на оваа колекција.
Новиот асортиман беше откриен на Пјаца дел Дуомо во Лече, град во Пуља, иако настанот беше организиран без публика, во согласност со мерките на претпазливост поврзани со пандемијата на вирусот корона.
Како бујна, романтична интерпретација на Пуља, оваа колекција вклучува цветен вез, нежни фустани од тантела и ткаени интерпретации на класични чанти на Диор – Lady bag и Book Tote.
Златниот накит го слави пејзажот на Пуља со прстени, нараквици и ѓердани во форма на инсекти, винова лоза и цвеќиња.