Од романтични, опуштени, боемски и носталигични изгледи, па се’ до шик, елегантни, урбани, отмени и класични комбинации, низ улиците на Париз ќе сретнете беспрекорно стилизирани дами, кои облеката ја носат грациозно и со став.
Има нешто толку лежерно и префинето во модната аура на Париз, што не може да се забележи на ниту едно друго место во светот. Француската метропола важи за светска престолнина на модата, а неговите жител(к)и за секогаш добро и вкусно облечени. Која е тајната на убавите парижанки? Во една прилика, модната икона Коко Шанел ќе рече: пред секое изглегување од домот, погледнете се во огледало и oтстранете едно парче од она што го имате на себе. Во Париз никој не е ни премногу дотеран, ниту пак премалку облечен, а нештата ги носат со стилска самодоверба која го надополнува едноставниот изглед. Така, релаксираниот избор на гардероба секогаш ги следи учтивоста, љубезноста и гордоста со која го поздравуваат светот. Парижанките го негуваат природниот изглед, каде акцентот е ставен на свежината и здравиот тен на ликот, а избегнување на пренападната и јака шминка. Кога се деталите во прашање, вешто го применуваат правилото: помалку е повеќе. На себе имаат малку накит, при што бисерите се добитната варијанта за дневно излегување, додека дијамантите се совршен детал за погламурозен вечерен изглед. Аксесоарите се минималистички и сложени со мера, а тоа се најчесто убава марама или шал, слатка лента за коса, големи очила и отмена чанта. Парижанките се познати и по добро скроените капути и јакни, со женствени и шик линии, но и удобните, а сепак стилски чевли кои им овозможуваат комотно да се движат низ градот. Во продолжение, ви претставуваме неколку инспиративни модни комбинации од градот на светлината, кои најдобро го прикажуваат разноликиот, но сепак препознатлив вкус на париските дами. Пронајдете ја омилената инспирација.
