Амбиентот на ресторанот е подеднакво важен фактор во целокупното ресторанско искуство, како и самата храна. Многу сопственици на ресторани водејќи се од оваа парадигма се особено внимателни кога ја одбираат локацијата на просторот, а во конкретниов случај очигледно направен е вистинскиот избор. Италијанскиот ресторан Grotta Palazzese лежи во градчето Polignano a Mare, јужна Италија и овозможува да искусите вкусна медитеранска храна во исклучително уникатно опкружување – пештерски амбиент.
Ресторанот што ги поставува крајбрежните локали на едно ново ниво, се наоѓа во внатрешноста на варовничка пештера, со поглед кон синото море и истиот е дел од истоимениот хотел, кој е изграден на самата карпа. Амбиентот на ресторанот е интимен, преовладува суптилно осветлување и едноставен мебел – како намерно да е оставено на необичната локација да го презеде комплиментот за естетика.
Замислете ги звуците на водата која се бранува и нежното ветре на лице, италјанска храна придружена од добро вино со вистинско друштво…незаборавно искуство, зарем не?