Со површина од 86 метри квадратни, ова прекрасно стилизирано поткровје е одличен пример како секој простор може да биде наменски искористен, без притоа да се загуби од убавиот изглед и удобноста. Блесок, свежина и комфор – дизајнот на ова атрактивно средено поткровје се заснива на светлината и суптилните бои, збогатени со внес на колоритни акценти во ведри и живи тонови. Уредено е модерно и непретенциозно, со малку парчиња мебел, светли подови, елегантни линии и топли дрвени допири во секоја соба. Белата боја ја сочинува основата на ентериерот, давајќи му чувство на пространост, хармонија и пријатен амбиент, а надополнета од големата количина на природна светлина која продира од мноштвото поставени прозорци. Креиран е отворен план во кој комуницираат дневната соба, трпезаријата и кујната, а станот располага и со спална и детска соба, бања, и мала, но кокетна тераса. Паметниот распоред овозможува комплетна функционалност, а минималистичкиот стил му дава лежерна нота за фин семеен живот. Слатките украси и текстилот со цветни дезени, ги внесуваат пролетните мотиви и природните нијанси во ентериерот, вдахнувајќи нежна игривост и динамика. Фантастична инспирација!
