Како го замислувате совршениот дом? Повеќе ви се допаѓаат модерно уредените ентериери, или, пак, сте од оние кои не можат да им одолеат на старите и рустични куќички? Доколку припаѓате на втората група, тогаш овој преубав стан ќе ве воодушеви. Неодоливо сладок, романтичен и по малку магичен, може да се пофали со прекрасен изглед во кој се вљубувате на прв поглед. Стилизиран е колоритно, но многу суптилно, балансирајќи помеѓу повеќето нијанси од неутралната и пастелната палета на тонови. Во секоја просторија доминираат рустичните парчиња мебел и шармантните винтиџ декорации, освежени со внесот на нежните бои и цветните мотиви. Изборот на разиграни тапети со различни дезени и фините ткаенини дополнително го облагородуваат амбиентот со живост и динамика. Иако делува многу опуштено и непретенциозно, сепак, ваков дизајн не е нималку лесно да се постигне во станбениот простор, имајќи предвид дека сите соби се уредени во ист стил и со еднаква посветеност на деталите. Во продолжение, погледнете ги фотографиите и откријте кое катче од станот најмногу ве инспирира. Полн е со убави идеи, па доколку сте непоправливи романтичари, можеби токму тука ќе ја пронајдете омилената и за вашиот дом.